close
心魔，唔系能力的問題，但就系有一道牆，擋系你前面，妨礙你前進。
兩年前因為救生員一句：小姐你游得咁差你真系唔好游過去深水區，你游一半好返轉頭。
其實果句話之前我系有一段時間成日去游水亦可以由泳道最淺水去到最深水，但果年第一次去游，唔知手腳突然唔系好協調，怪怪的我就系中間停左而比救生員話，咁當然佢都話得好啱，佢的職責亦都唔應該比啲唔識游水的人過去，從此，我冇再游過去，中途就停，再折返，中間無論有咩人同我講你可以架，游過去，但我都好驚，尤其好驚救生員，佢地一吹哨子或者望住我，我就好驚，心諗：D，我又做錯左啲咩？冇戴帽？泳鏡？泳衣？游得好屎？！甚至後來有個唔識的叔叔，游游下同我講野：阿妹，你都游得OK，做咩次次中間就停，唔游過去？！咁我就話：我唔夠氣。叔叔系度笑：你根本就系唔夠膽！我都笑，因為我知叔叔講得啱，因為我曾經成功過無數次，所以唔會系能力的問題，只系我的心魔每次都同我講：游到一半你就要停。
咁當然，游一半定游哂成條泳道，其實對一個只系興趣去游下水的人黎講，唔系好重要，但好可能會阻到後面的人，因為你下下游到一半又停，佢可能都要就住你一齊收等你行開，但我就好介懷，你明明可以做到，點解要因為一句話就唔游？你系游到，果次只系你剛剛返去游未習慣啫，但果一年，我都冇克服到，依舊系游一半就停。
今日，我突然有種好大的衝動想游過去，唔知系咪因為今日游的人好少，鼓起左好多啲勇氣，都系游到一半就折回，同自己講，下一次，下一次一定游過去，再練習多次，中間有啲會唔游停左系度好耐集氣，覺得下一次就一定得，終於有一下，我想起賤輝話：驚，你就輸成世。我想起五月天的派對動物：Let go party party all night, oh oh oh, hey many many good time oh oh oh, 進化兩億年卻沒有進步。踏出果步，游到中間，同我自己講：唔準停，你可以，放慢速度，好好咁感受住自己的呼吸，心入面一直想住派對動物的旋律，再一次由最淺去到最深，我望返去，見到PHILIP系最淺水的地方對我比左個讚，我都好開心咁豎起我的大姆指比左個讚自己，今年，你好叻，為自己做左好多個決定，雖然未走到最後，都未知決定好與唔好，或者有一日你都會後悔或者不解，如果冇做到呢個決定就好，但唔緊要，呢一刻你只要踏出呢一步，就只需要勇敢行落去，未來本來就冇人知系點，後悔咪到時好好地咁後悔，成功咪好似今日咁，豎起大姆指比自己一個無敵大讚，咁你就越黎越好，越黎越勇，越黎越活出你自己。
全站熱搜
留言列表
